$100,000 Fa'atupega fa'aleleia atili paka Liona

O lo ua mae’a fa’ailoa mai le maua fo’i o le fa’atupega na talosagaina e le Matagaluega o Paka ma Malae Ta’alo ina ia toe fa’aleleia atili ai le tatou Paka Liona i Nuuuli. O le aotelega o lea tinoitupe ua pasia lelei mai e le Konekeresi ae toina mai le National Parks Services  le Malo Tele, e $100,000.

“O le tausaga ua te’a, na palotaina ai i le Komiti o Natural Resources ina ia fa’amalosia le fesoasoani mai pea o lea vaega e fa’atupe nisi o polokalama e fa’aleleia atili ai paka i so’o se setete ae maise lava o teritori fa’aatumotu o Amerika i le Pasefika. O se mea lelei, ona o le amataga o le tausaga e 2019 ae pasia loa lea pili fa’aulu e avea ma tulafono ma ua talosagaina ai loa lea fesoasoani e le taotu Matagaluega o Paka ma Malae Ta’alo, ma ua fa’amanuiaina fo’i e pei ona i ai nei,” o se fa’amatalaga lea a le tama’ita’i Faipule o Amerika Samoa i le Konekeresi, Aumua Amata, ina ua faamanuiaina lea fo’i talosaga.

I le fa’atulagaga o le fa’aaogaina o lea tinoitupe, ua fa’ailoa mai ai o le a fa’aaogaina mo le toe fa’alautele ma fa’aleleia atili o le Malae Basketball i le Paka Liona.

O le fa’amoemoega sili lava o le LWCF lea ua pasia nei lona fesoasoani mai i teritori, e tatau lava ona fa’aaoga Paka nei ina ia fa’aleleia atili le soifua maloloina o le atunu’u i ona tupulaga talavou ma ona tagata matutua fo’i. E ese mai le tele o fa’amalositino e ao ina fa’atulaga e faia ai, ae ia mafai foi ona fa’aleleia le gataifale ia lelei mo fagotaga a’o tatafao aiga i paka uma o le atunu’u.

O lenei fesoasoani muamua ua tatou agava’a ai nei, o lo ua fa’ailoa mai, o le a fa’ateleina nisi fa’atupega e mafai lava ona maua e le Matagaluega o Paka ma Malae Ta’alo i teritori uma lava fo’i, aua ua pasia nei fa’aletulafono lea fesoasoani mo tatou tagata ia fa’aleleia le tatou soifua maloloina e ala i ta’aloga ma fagotaga e faia fa’atauvaga i paka ma malae ta’alo.