SUSUGA SAVALI TALAVOU ALE, FOFOGA FETALAI, MAOTA O SUI

Susuga e,

E faaali atu ma le faaaloalo la'u faatu'i'ese i lau faai'uga ua lē tofia ai nisi o alii faipule ua filifilia mai i itumalo, i ni komiti galulue o le Maota o Sui.  O le tala ua tusia ma faasalalau, o le lau faasalaga lea o faipule e lē i palota ia te oe i le filifiliga o lou tofi Fofoga Fetalai.

Fofoga Fetalai, afai e moni le faasalalauga, ua e sōloia la le isi vaega o āiā sa'oloto faatemokarasi o tagata o le Malo, i latou na filifilia e le 'au palota a itumalo e faaleoina o latou finagalo.  Ua pei ai o ni foe e faaee i le tau, finagalo o itumalo na filifili ai o latou sui.  Ua e faasala le afe ma afe o le 'au palota, e aofia ai tupu ma ee ma le mamalu o le atunuu.

E lē tau faamatalaina le mea ua e silafia, o komiti e faatino ai galuega ma taualumaga o pili ma iugafono e faaofi i le fono.  Ua 'ou faalogo e iai pea le avanoa o faipule lē-tofia e toafa e fai ai fesili, pe a faaiu iloiloga a faipule na tofia i komiti.  E ese le iai o le avanoa, ese le aofia i le tōfiga e mautinoa ai e logo i fono ma maua le avanoa e filifili ai i i'uga a le komiti. 

I le ma lea, i la'u lava vaai, o isi ia faipule o loo iai agavaa tāua e tatau ona taualoa ma faaaoga.  E lē i sesē le filifiliga a o latou itumalo.

Toetoe o le 'afa o faipule uma o le Konekeresi i Uasigitone, e lē i palota i le Fofoga Fetalai (Nancy Pelosi), ae leai se isi e aunoa ma se komiti, e ta'ilua.  Aiseā ea o le a tatou o ese ai mai le ata na faavae ma sau ai la tatou Fono i tausaga e tele?

O si fautuaga a lenei toeaina ua tele tausaga o mulumulumea i upu o faigāmalo, a iai ni ou alofa i le atunuu ma lona aga'i i luma, Fofoga Fetalai e, toe liliuliu lau tofā ae toe fou lou sa i Futu.  E mamalu la tatou Fono Faitulafono i le tofā ma le faautaga faaleatunuu.

Ma le faaaloalo e tatau ai,

Fofō I. F. Sunia