Na asia e le EFKAS i D.C. Maryland & Virginia nisi o fanau a Samoa ua lē mafai ona toe fo’i i amerika Samoa — COVID-19

Na asia e le EFKAS i D.C. Maryland & Virginia, le sili atu ma le 10 alo ma fanau a Samoa ua faaiuina a latou AIT (Advanced Individual Training),  I le Aso To’onai, Setema 19, 2020, i le U.S. Army Base iFort Lee, Virginia.

O nei alo ma fanau, ua lē mafai ona toe fo’i i AmerikaSamoa, ona o tulaga o le faama’i Koviti 19, faapea foi le tapunia ai o femalagaiga.

O le EFKAS-DMV “Tafatolu mo Keriso”, o loo i lalo o le taitaiga a le susuga i le Faifeau Misionare ia Apisaloma Toleafoa ma le faletua ia Lora Toleafoa.  

Ina ua logo tala le ekalesia o loo iai no alo ma fanau a le atunuu ua mae’a a latou vasega(AIT), ae o loo taofia lē tumau i Fort Lee, o lea na a’e ai se tofa ma se faautautaga i le faifeau ma le ekalesia, ina ia a’apa atu ma āsia i latou i Fort Lee, Virginia. 

Na ta’ita’ia le asiasiga e le Faifeau Misionare iaToleafoa, faapea foi le Laulauafono a le Ekalesia, Le Susuga I le Taitaifono ia Vaueli Taala, faapea le Teuoloa ia Isapela Coggins.

 Na auai atu foi i lea mafutaga, Toa o Samoa Ua avea ma A’oa’o ma tiakono a le Ekalesia i DMV, ma o loo tiute pea i le Vaegaau a le Army i le Setete o Virginia, e pei o le susuga ia MAJ Tua, Ulisone, AF, MAJ Alaimalo Oloie L.TK, 1SG Galoia Upuese F. TK, SSG Namu-Pine Lanilua, TK., SFC Leaupepe Samantha, SSG Tupuola-Berry Putu, ma le Vetereni ia Liavaa Atuatasi, TK.

Na amata le mafutaga i se faigalotu na taitaia e Susuga i le Faifeau Misionare ia Toleafoa, ona saunoa faafeiloai lea o le Susuga i le Taitaifono ia Vaueli Taala, ma sosisi ai ma se taumafataga o taumafa Samoa na saunia e le Ekalesia. 

Sa maua foi le avanoa e talanoa fiafia ai i nei Toa o Samoa, faapea ma le faamalosia’u a le Faifeau ma le vasega o Tiakono, i alo o le atunuu, ina ia Faamalo lisi pea ma mafuta i le Atua i talosaga, a’o tapuaia lo latou alo faiva e o latou matua, faapea le aufaigaluega a le Atua ma le atunuu.  

Sa matua faafiafiaina le fanau i lea aso i la latou mafutaga, e viia ai le Atua i avanoa, a’o se laolao na atofa i lea mafutaga matagofie ma ia Toa o Samoa.  Sa saunoa faafetai SSG Namu-Pine Lanilua e fai ma sui o Toa o Samoa ma tuuina mai ai la latou meaalofa tupe mo le Ekalesia i lea aso, e faaalia ai lo latou agaga Faafetai.

Na faamae’a le mafutaga i le tatalo faaiu na fofogaina e le Faifeau, ma toe foi ai loa ia Toa o Samoa i lo latou nofoaga o aumau ai.  

E avea foi lenei laolao, e momoli atu ai le faafetai tele, i talosaga, faapea le tapuaigaa le EFKAS Aoao, le Aufaigaluega a le Atua, o mātua,  faapea foi le malo ma le atunuu.