AFIOGA A GAOTEOTE PALAIE, PERESETENE MA LE MAOTA MAUALUGA

Afioga e,

 Ua lagona le faanoanoa, ina ua outou faamaonia o le senatoa fou mai Fitiuta, Faleasao, ma Ta'ū.  Ua outou lē amana'ia ai le mana'o tupito ona tāua o le Faavae: ia filifili faaleaganuu faipule o le Maota Maualuga.  E manino lelei upu o le Faavae, Vaega II, Maga 4, "E filifilia faipule o le Maota Maualuga e tusa ma tu ma agaifanua a Samoa e 'aufono a itumalo i itumalo o le a suia e i latou....".  O le fatu lena o le puipuiga o a tatou aganuu.    E lē o se filifiliga e fai toatasi e ofisa maualuluga o le Malo, pe ala i se tusi faasavali e saini ai ni matai o se itumalo; a o le filifiliga faaitumalo e aofaga faatasi ai le 'aufono poo 'aufono a itumalo. O le upu moni: e lē i faia se filifiliga a 'aufono o le itumalo.

 Ua ou manatua ai nei ma le maofa, le loloto ma le mau o tofā a o tatou tamā. I le ilologa o le Faavae i le 1966-67,  na latou matuā tutū malosi ma vilivilita'i o e tetee le Initeria i le mataupu lenei: filifilia o faipule o le maota maualuga.  Sa mana'o le Initeria ia faamalosia le i'uga a le Faamasinoga Sili a le Malo Tele, ia "tasi le tagata -  tasi le palota".  O le finauga a o tatou ta'ita'i afai e filifili faalaua'itele faapena faipule o le maota maualuga - o le a leai se malosi faaleatunuu i le filifiliga, o le malosi lena e malu ai le soifuaga faaSamoa ma ana aganuu.  I lo'u lagona faatoeaina, o le faai'uga e pei ona outou faia nei, o le a māluelue ma i'u ai ina manunu le puipuiga o filifiliga faaSamoa, pei ona finau ai ma loimata o tatou tamā.

 Afioga e, ta'ita'i o le Malo ma tamā o le atunuu, o le tagitagi a le pumate, o le ōlotu a si moemoeao e 'ai'aiuli i outou faiva manaia.  O lena tou te sapi ma seei i tofi e ala i tulaga faaleaganuu, se'i tuutuu loloto le tofā ne'i sātia puipui e malu ai a tatou aganuu.  E popole i le vaai atu a lenei  toeaina tapua'i, ua faapili le amiotonu, faaeva le tofā pa'ia, ae taai faafala seesee le mamalu o si o tatou atunuu, i le malosi o feseua'iga faapolokiki.  E 'asa le faiva ae le 'asa le masalo, o le tapenaga o le senatoa fou, o se laau na fafau e ta'ita'i o le Malo.  Se'i tautuanā si o tatou atunuu ne'i pele i upu;  ae tonu ai le auēga a le fatupese Faleasao, "ua e faalata i le tofi, ae galo ai lou atunuu moni."

Ma le ava tele e tatau ai,

Fofō I. F. Sunia